|
Ce ebi ge zhe wenebe nu uwaŋnaa? N nge zhe Tijala. Imbe εbu kwubε nu ujalaa? N kwubε shεlụma shi gembi ufwugwo.
By kwunε kwo bu ko suu? liŋ N kwunε shi yebi. Bi yεwa shụ suu hwε? Awo aka N senji shu wenebe. Bi 'yajε ya ukwuribi duwa.
N so du tugwuno nu ukwuribi at a my wenebe.
|
|
Maraba! Maraba! Okwu! Okwu!
Hualeji: Ihiŋ! Ihiŋ! Okwu! Okwu! Sheneni: Ce εbi zhεԑ? Hualeji: N zhajԑ no ofwo bu. Sheneni: Imbe aba jalaa? Hualeji: Ma jala n-ngana me Apipa. Sheneni: Mumba aba jalaa? Hualeji: Ma jala mu ta. Sheneni: Ashamba εbi zhԑ ba saa? Hualeji: N zhԑ ma sa unaira uko. Sheneni: N leni iwεnԑ to yaa shε gabụ. Hualeji: Gana na Ngεԑ zhԑ mo no muu? Sheneni: Jajaga mu weewee i ci ogwu woshi nazhε ni. Hualeji: N njε ugwoje bu duwa duwa. Sheneni: Na nda n-ngana ma ata tebiye oo! Hualeji: Tugwo oo! 'walụ biyikwo bu keeni miaụŋ mụ bụ. Sheneni: Oo! semi nyajita oo! |
|
Ụkpakwụ keeni Uwawayԑ a shε la atwa ne tiyejo, ama ụkapkwụ kiri wa zhajԑ ni ihwε Uwawayԑ
Jitoo ko Ụkpakwụ hiεŋ Uwawayԑ, Hwure ti zhe ni ihwε butatugwa mi hileniye urefu, maa Ma kwuba ulapia ubwa. Uwawayԑ kaa 'ye shi ataga, ama Ụpkakwụ tuba wo woto ne meni. Ibԑ Uwawayԑ hiεŋ Ụpkakwụ Gana na Ngee eri ma zha ti Ngee 'ye shi atagaa? Ụkapkwụ hiεŋ Uwawayԑ, N zhԑ ma ụhaŋtụ na cԑnjԑ-ti'wŋεnԑ maa ti teni ti ki hilenye urefu. Uwawayԑ leni maa bi zhԑ ba zha ti yaa shε Ụkapkwụ mo ụhaŋtụ na cεnjԑ-wŋεnԑ. Ibε po ee jwe ụjita u tahaŋnụ.
Ụkpakwụ gwuri, boo mo ga ụhaŋtụ na cεnjԑ-wŋεnԑ, ụ zhԑmε tebiye. Ama Ụkpakwụ kaa tweni shi ụhaŋtụ ata nu ulwa. Aka na tụ ụjita tahaŋnụ ci, Uwawayԑ zhajԑ nụ ụpalanụ meni, Ụpkakwụ du banԑ ne meni ee ci ofwo ụhaŋtụ. Ee zweni i'wεŋnԑ ya aba nụ ụhaŋtụ. Ụkpakwụ shishigeni ụhaŋtụ ne meni, bee munji bee teni nụ ụhaŋtụ du, bee kwuni ihεŋtԑnԑ; e te zhe shi taa dụlụ ụhaŋtụ yabigwa ne meni. Uwawayԑ kaa 'ye shi ataga maa banԑ ne meni ni ikεŋyi ibwԑ, bee swe meni tebiye. Nazhε biyejilo bwa ga Ụkpakwụ na ge 'yebi ataga mbiyeni bu bԑ vwԑ bu. Ama i'wεŋnԑ ibwԑ tuba I njε ufwu hwεԑ.
Ibԑ po amε Ụkpakwụ hashԑganụ tebiye. Iwεnԑ po bụ kwụbε gana na te biyejilo bwa zasa ya i'wεŋnԑ elele. Ibԑ po Ụkpakwụ eneji ya no ofwo elele maa kede bụtụ be elele mo ya ụhaŋtụ na cεnjԑ-wŋεnԑ o. Ibԑ po atwa me shi yε ụhaŋtụ na cεnjԑ-wŋεnԑ taa hwayε. Gabata ofwo elele na abụ kwụbε ta bụtụ ba nda ụhaŋtụ, bi zhԑ ba kwuba maa nụ-ụ'wụ'wụ ba
shaba uŋ; kwo kaa ni iyi inyε nԑ 'yajε ikεnyi uhwuri ụ'wụ'wụ gana tu ụshεmbεrԑ.
|
|
Aka oko namba la Agwuma enenji ujala. Igԑzu hiεŋ, Bụtụ be elele na kwụbε shε usunda beyi nu ujala ata, ga a kwụnε bụ.
Ibԑ iyi heri, aka na ta aka ujala gwumwonu, Igεzu leyi malabụ mụ'wụtụ, bεԑ zhinjԑ malabụ tobwolo ujala hwuwowo
tuhwoŋtu cebe. Igεzu hiεŋ, Aŋ aaŋ, gana na Ngεԑ zhԑ ma ndaa? Atwamwa kwunua usunda hwεԑ, asha Gamba na Ngee
shiri undwa ụ bụtụ tụkwụna, Gamba yε εԑ zhԑ a kwụna. N zhԑ ma zha waa nụ ụrԑ okwo buswa Ngεԑ kwunε hwayε asha m benengeni tu'wo.
Ibԑ Igεzu sanԑ gaa nụ ụrԑ bee rinji uuwa bee lukwumi, bụ kwụbε shε kaa okwo buswa. Ibԑ baa sanԑ ujiyo.
Aka na ti bee ci ujiyo,
baa kwụbε ti ihiulwe ike i ticcwԑŋ
|
|
Idԑwuŋ keeni Igԑzu a shε atwa na a hwaŋ itimԑ. Ụkpakwụ tuba wa nda tuwa. Ibԑ Idԑwuŋ ni Igԑzu to shigwu sha aba. Ԑԑ hiεŋ aba zhε no ofwo Ụkpakwụ maa ndana aŋ ufwasa maa n-ngana ma aba mi teni. Ibԑ Igԑzu hiεŋ Ụkpakwụ, Ma jala maa n ndanԑ ufwasa maa n-ngana mi mi mu no tono mi cenje cenje. Idԑwuŋ hiεŋ Ụkpakwụ, Ma jala maa n-ngana mi mi mu no tono mu ko. Nazhε. Ụkpakwụ ndanԑ aŋ ga ufwasa, ee hwuri ujiyo.
Aka na te e ci ihwε, ee zhe aa njε ufwasa na n-ngana ma aba. Ama Ụkpakwụ go mbiswo Igԑzu maa n-ngana mi cenje cenje mi zha shε ma zhεma semi ga shε mu ko mu ko kwo kaa mi yeyebi. Ama Igεzu lacε.
Aka na tu n-ngana mi ci tiya, Igεzu zhe bee hine n-ngana mi cenje nu ugwu uko, mu twa sụ bu kaa tiya o. Bee hini ogwu e yebi, mu twa sụ bụ waa. Iwεnԑ po mu namε cwԑŋ. Ama Idԑwuŋ zhe ne ehilo ubwa bee hine ijεnԑ ike gba, yee gembi bu tiya okwo iwεŋnԑ i yebi. Igεzu yԑ n-ngana mu bwa, fwalaa mo hwuwowu. Ama mu na mi Idԑwuŋ mu ta barԑ. Ibԑ Igεzu, zhe bεε hiεŋ Idԑwuŋ, M peni kaa n-ngana mụ bụ ma ya, maa unywanywa ci hwuŋ ma bụ tupa. Idԑwuŋ hiεŋ bụ, N zhε ma bu pana hwayε gaa kiri ama ta ma lụpa ya nyajita o. Igԑzu hwuri ujiyo, bee hwuwi ijεnε ebe Idԑwuŋ peni bu tiya. Bi eri shi kaa be gwure no ofwo Idԑwuŋ maa lụpa bụ sasana, ezuye shε bụ.
Ibԑ po Igԑzu zhe izunde ne ehilo Idԑwuŋ. Bee zunje n-ngana mu bwa. Idԑwuŋ zhe ne ehilo ubwa, baa kwụbε te e zunji n-ngana mu bwa. Bee jiye, bee heŋteni Igԑzu, okwo ubwa zunji n-ngana mu bwa. Igԑzu hiεŋ, Awo, shε Gamba o. Nazhε ujita uko u ci, Igԑzu zhe sasana bee zunji n-ngana mi Idԑwuŋ.
Aka na ti Idԑwuŋ kwụbε maa e zunji n-ngana mu bwa sasana. Baa suyanԑ Ụkpakwụ, Bεε hiεŋ bụ, Hwuri maa po ụgbakwụ nụ ụshԑpwụ tu, iwεnԑ po e hwuwi n-ngana mi mi tuzundo hwεԑ. Nazhε Ụkpakwụ heŋteni Idԑwuŋ bεε hiεŋ, Gaaba tuba ebi heŋshi maa ubwa bo zundo n-ngana mụ bụụ? Idԑwuŋ hiεŋ bụ, N heŋshi maa gԑ Igεzu. Ibԑ Ụkpakwụ zhajԑ; boo po atwa kpaaŋ ụgbakwụ ama i zasa bụtụ be elele na ụgbakwụ 'imԑ o. Aka na ti yee ci no ofwo Igԑzu, baa nda unyasa maa gana na tu ụgbakwụ 'imԑ shε bụtụ be elele, asha gana ata du waa zha shε wa ima bụ. Ama aka na to o po Igεzu ụgbakwụ, waa 'imԑ bụ. Baa twa ifelu uuwa baa
dwatwagwụ wuŋzu wuŋzu.
Ibԑ po Igεzu namε hwayε wuŋzu wuŋzu. Izunde ibwԑ ibԑ po baa shε gana Atwa.
Iwε ecilo ata, bụtụ bụtụ ga ganga izunde,
iwεnԑ te bi mepi shi iyi nε izunde bu zhε ma bu 'waŋnanԑ gana na ti izunde njε Igεzu ufwu hwayε.
|
| Gε Sԑkpԑ shε bishi Jere. Gε Sԑkpԑ hiεŋ Jere, Hwure ti ipi hwayԑ. Ge Jere leni, ee ipi ne ehilo. Nazhε ee kwuni ogwu tεta nu uvwungwa. Ga Sԑkpԑ ba Shana ikεnyi tebiye. Ama ge Jere eri shi ba waŋna ugwu okwo uko. Yaa namε fwalaa bε hiεŋ uhiuhiu wa gwuma bụ. Bishi bwa mepi kaa maa ụzagwụ ba dwa, bε hiεŋ bụ, Shana ikεnyi waa maa ti ji. I ilegeji shi ge Jere hiεŋ, Ana nu n to nu uvwuna. Gε Sԑkpԑ hiεŋ Jere, Yaa shε ana bu to asha zhaga ujiyo. Aka na ti ge Jere jiye ni ihwε bee kwuni tụlagwụ. Bishi bwa jiteni bu tu ba nanga tụlagwụ. Bee mepeneni maa ụzagwụ ge Jere jwe iwε ana ata. Bishi bw |
| u jitaala
N nge zhe udukwo Ikenda jitaala. Ngaa 'waŋnԑ maa ma sanjԑ nu udukwo. Ama uhwaŋna Ikende zhԑshε kwo cwεŋ.
Shεkpada shε njε ufwu hwεԑ. Aka na Ngee ci udukwo Ngee senji ivwεgԑ mi. Nazhε aka na Omo rungo nu udukwo, Ngaa kwụbε iyi tusanga ufwugwo. N kwụbԑ ashεna, no ohiu keeni n-ngana. N kwuajε du okwukwundkwu, na arupasa, ni igwezhe keeni omogworo na lacԑmԑ tiya tabeye. Aka na Eme ci ujiyo Ngεԑ sε okwukwundkwu keeni ohiu maa Ma nda ukwunu. Eshilo ngbi tebiye ibε po Ngee leyegaji i'wεŋnԑ mi 'waŋ ne men Ihwεԑ. Ngεԑ ishijԑ, ama uvwuna mu dwonu ibԑ Ngεԑ shikeci, nazhε Ngee ci ihwε Ngee weci nu ụngwụ ubwa
iwεŋnԑ i tεtu nazhε Ngee debeji sasana.
|